تی سر چی بامو !؟
کی تی جنگلان د سر سبز نیئید
تی رو باران د تمیز و شاداب نیئید
تی شهرانه در و دیواره جا غم واره
من تی بی کسی واسی ای گیلان پورم جه ایجگره
تی سر چی بامو !؟
جه تو همه فرار بو کودید و آواره اید
تو کی تی وارانه جا نشاسی دیل کندن
جه تی قشنگی و سر سبزی نشاسی دورا بوستن
تی سفیدروده خاطراتا نشاسی فراموشا کودن
من تی سادگی واسی ای گیلان پورم جه ایجگره
تی سر چی بامو!؟
چره بهاره موقع تی بول بولان د نخانیدی
چره تابستانان تی خالی داران د گول ناریدی
چره تی پونل پائیزان د رنگ و وارنگ نیئه
چره زمستانان تی نما کومان د خالیه
من تی بی زبانی واسی ای گیلان پورم جه ایجگره
تی سر چی بامو!؟
چره تی بجاران د تازه بکاشته توم ناره
چره تی چایی باغان د خالیه و چایی چین ناره
چره تی روباران د کاسه کولی و سیاه کولی و ماهی سفید ناره
من تی دئن و گب نزئن واسی ای گیلان پورم جه ایجگره
تی سر چی بامو !؟
گب بزن بو گو مره جه تی دریا
جه سفید رود و شیطان کوه و درفک
بوگو مره جه ماسوله و قلعه رودخان
چره تی ایسم ناره د ابهت سابقه مانستان
کی یا وا بگم می دیله دردا
کی تی واسی من ای گیلان پورم جه غورصه
پورم جه درد و جه بی تابی
پورم جه ایجگره
-------------------------------------------
جه : دامون گیلک پور
