زای بوم , کی شوئیم کولی گیری
صبح زود ویریشتیم , تا یاد بیگیرم جه می برار , خمیر گیری
اگه خواستی کی جه فلانی بیشتر بیگیری
بایستی کی خمیرا چوطور آماده کودن قلق یاد بیگیری
خروس خوان کی نوبوسته ویریزی
سور و سات کی آماده بوبوست راه دکفی
اول از همه , حسن آشفروشی بازار روز میانی
ایتا کاسه آش قلمکار سر صبح زنی تی رگ میانی
کو سامان بهتره کی بیشیمی؟
دیروز محمد یخ فروش دکه , کولی زیاد باوردیدی
خولاصه جه سد سنگر و کونوسستان شروع کونی
تا کی بازقلعه و کیاسرا و سدهء ور زنی
جه چهارده و لولمان و رشت آباد رد کی بیبی
به شهید بهشتی و آستانه کورپی فاراسی
جفت جفت , اشکل کاس و سیاه کولی
بعضی وقتانم , ماهی سفید و دوروشت زرد پر گیریدی
تی سرا بدرد ناورم می جان برار جه پور گبی
خولاصه صفای دیگری داره سفید رود میان قرماق تاودی
اگر عمری باقی بمانه امره روزی روزگاری
دیلتنگه واگردستنم و دوباره شون کولی گیری
سفید رودا عوض نوکونم با همه ئ دونیا به هیچ قیمتی
رشت خیار و نان و پنیر و باقلا و تازه سیر
نهاری کی , سفید رود روبار کنار خوریدی
ارزش داره به تمام دونیا روباران میان , قارماق تاودی
--------------------------------------------
جه : دامون گیلک پور
